Простыя лiкiЧартарны і рэгулярны рэйс: які выгаднейшы?

Адны авіябілеты прыходзяць на электронную пошту адразу пасля куплі, а іншыя трэба атрымліваць перад вылетам (за суткі ці нават за некалькі гадзін). І гэта не адзінае адрозненне паміж рэгулярнымі і чартарнымі авіярэйсамі. The Village даведаўся пра асаблівасці абодвух відаў і параўнаў цэны на папулярных кірунках.

Рэгулярныя рэйсы

Гэта пастаянныя рэйсы авіякампаній, якія праходзяць паводле загадзя зацверджанага раскладу. Перавозчыкі самі вырашаюць пытанне запаўнення самалётаў і самі або праз сваіх агентаў прадаюць квіткі. Менавіта таму білеты, у якіх змяшчаецца ўся інфармацыя аб палёце (дата, час, напрамак), аб авіякампаніі і пра вас, можна атрымаць адразу пасля аплаты.

Плюсы

Палёты паводле раскладу, таму, нават калі на ваш рэйс авіякампанія прадала мінімальную колькасць квіткоў, вас усё роўна даставяць на месца прызначэння.

Час вылету фіксаваны — можна спланаваць перасадкі на іншыя рэйсы, а таксама свой адпачынак.

Гнуткая сістэма тарыфаў у залежнасці ад колькасці багажу, класа, магчымасці вяртання білета ды іншых фактараў.

Няма абмежаванняў на пакупку квіткоў у адзін канец.

Мінусы

Абмежаваная колькасць рэйсаў на курортныя кірункi.

Малы ахоп кірункаў: рэгулярныя рэйсы лётаюць не ва ўсе гарады і не ў кожную краіну.

Чартарныя рэйсы

Гэта адмысловыя заказныя рэйсы. Заказчыкамі ў асноўным выступаюць турыстычныя фірмы, якія складаюць з авіякампаніямі дамову фрахтавання паветранага судна (або паветранага чартара). Яны выкупляюць увесь самалёт ці яго частку для выканання аднаго або некалькіх рэйсаў, а потым самі прадаюць квіткі і фармуюць спісы пасажыраў. Таму, набываючы білет на такі самалёт, варта памятаць, што вам гарантуюцца толькі дата вылету і кірунак палёту, але час адпраўлення можа мяняцца.

Плюсы

Толькі наўпроставыя пералёты.

Рэдкія напрамкі, з якімі няма рэгулярных авіязносін.

Замена імя ў білеце — бясплатная або з мінімальным штрафам, бо выніковыя спісы пасажыраў фармуюцца перад вылетам.

Мінусы

Адсутнасць фіксаванага і гарантаванага часу вылету і, такім чынам, немагчымасць спланаваць перасадку.

Толькі незваротныя квіткі: вярнуць падаткі і зборы, як у выпадках з рэгулярнымі рэйсамі, не атрымаецца.

Канчатковая інфармацыя аб авіяперавозчыку часта становіцца вядомая толькі пры атрыманні квіткоў.

Чартары звычайна не ўдзельнічаюць у бонусных праграмах авіякампаніяў.

Калі могуць узнікнуць праблемы

У некаторых краінах дзейнічае правіла, згодна з якім трэба прыляцець і пакінуць краіну на рэйсах аднаго віду. То бок, калі вы прыляцелі на чартэрным рэйсе, то і ляцець варта на ім. Аналагічна гэта прымяняецца і да рэгулярных рэйсаў. У Каралеўстве Тайланд такое прадпісанне выцякае з нацыянальных авіяцыйных правілаў і патрабаванняў, за якімі сочаць на пашпартным кантролі. У Індыі мытнікі часам могуць не пусціць на рэйс вылету, калі ён адрозніваецца ад рэйса прылёту. Асабліва яскрава гэта праяўляецца ў аэрапортах Гоа.

Праблемы з вылетам магчымыя і ў выпадку фінансавых цяжкасцяў у турыстычных аператараў, калі яны вымушаныя адмяняць рэйсы з-за немагчымасці аплаціць іх.

Наколькі адрозніваюцца цэны

Кошты могуць быць ніжэйшыя на чартары, бо авіякампанія прадае ўвесь аб’ём крэслаў заказчыку па групавым кошце. І пасля, калі заказчык недагружае рэйс, ён можа аддаць квіткі ў вольны продаж па ніжэйшай цане. Але ўсё залежыць ад попыту на той ці іншы кірунак, то бок таннасць чартараў — гэта не сістэмная рэч.

Тэкст: Валерыя Бялова