The Village Беларусь з дапамогай экспертаў працягвае знаходзіць адказы на працоўныя пытанні. Гэтым разам узанаем, як правільна паводзіцца ў сітуацыі, калі калегі ці аднакурснікі даведаліся пра вашу сексуальную арыентацыю супраць вашай волі.

Сяргей Зікрацкі

адвакат

Сексуальная арыентацыя адносіцца да звестак аб асабістым жыцці. Разгалошваць такую інфармацую забаронена законам.

У выпадку, калі нехта ўсё ж такі разгалосіў гэтыя звесткі, ёсць некалькі варыянтаў яго пакараць.

Па-першае, артыкул 179 Крымінальнага кодэксу Рэспублікі Беларусь прадугледжвае адказнасць за незаконнае распаўсюджванне звестак аб асабістым жыцці. Санкцыя за такое парушэнне – грамадзскія працы, штраф лібо арышт. Паколькі справы па гэтым артыкуле адносяцца да справаў прыватнага абвінавачвання, заяву аб злачынстве трэба падаваць не ў праваахоўныя ворганы, а ў суд.

У заяве ў суд аб узбуджэнні крымінальнай справы аб разагошванні звестак пра асабістые жыццё трэба ўказаць найменне суда, у які падаецца заява; апісанне злачынства (якім чынам і хто распаўсюдзіў звесткі); звесткі аб правапарушальніку; доказы, якія падцвярджаюць вінаватасць правапарушальніка; пералік асоб, якіх трэба выклікаць у судовае паседжанне. Заява падаюцца з копіямі па колькасці правапарушальнікаў, якіх заявіцель просіць прыцягнуць да адказнасці.

Па-другое, артыкул 151 Грамадзянскага кодэксу Рэспублікі Беларусь адносіць недатыкальнасць асабістага жыцця да нематэрыяльных благ, а артыкул 152 гэтага кодэксу ў выпадку парушэння гэтах благ дае права патрабаваць кампенсацыі маральнай шкоды. Дзеля гэтага трэба падаць іск у суд, папярэдне сплаціўшы пошліну ў памеры 3 базавых адзінак (на сёння гэта 69 рублёў).

Як крымінальныя, так і грамадзянскія справы ў беларускіх судах па агульнаму правілу адкрытыя. Аднак справы аб парушэнні права на асбістае жыццё могуць быць разгледжаны на закрытым паседжанні, калі будзе такое патрабаванне аднаго з бакоў.

У тым выпадку, калі звесткі аб прыватным жыцці былі распаўсюджаны ў інтэрнэце, я раю звярнуцца да ўладальніка сайта з патрэабаваннем аб выдаленні гэтых звестак. Калі такое патрабаванне не будзе выканана, яго таксама можна заяўляць у судовым парадку.

Марына Уладзімірава

псіхолаг

У любога пажару ёсць падпальшчык, а ў любога падпальшчыка — матывацыя. Перш чым раздзімаць агонь, магчыма, ёсць сэнс уздзейнічаць на ягоную крыніцу. У любым выпадку, для пачатку варта прааналізаваць сітуацыю. Задайце сабе пытанні: калі аб вашай арыентацыі даведаецца начальнік, ці могуць вас звольніць? Панізіць у пасадзе? Ці страціце вы павагу калег і кліентаў, калі яны даведаюцца пра гэтую інфармацыю? Ці павераць яны ёй? Ці варта вам праз гэта турбавацца аб вашай прафесійнай рэпутацыі? Чыя ацэнка для вас сапраўдная важная?

Зараз звернемся да крыніцы пажару, уздзеянне на якую можа ў некаторых выпадках ліквідаваць саму сітуацыю. Хто запусціў пагалоску? Выпадковы збег абставінаў — апынуліся не ў тым месцы не ў той час? Калега, якому вы адмовілі ў флірце? Зайздросны супрацоўнік, незадаволены вашымі поспехамі ў працы? Калі гаворка ідзе пра ненаўмысны аўтынг, часам дастаткова цвёрда папрасіць тых, хто пляткарыць пра вас, спыніць гэта рабіць, патлумачыўшы магчымыя для вас наступствы іх учынкаў.

Калі вы думаеце, што вас могуць звольніць, набярыцеся адвагі пагаварыць з начальствам, раскажыце праўду. Падайце аргументы, чаму ваша асабістае жыццё ніяк не ўплывае на прафесійнае, і падкрэсліце, чым вы карысныя кампаніі. Варта таксама зразумець, хто з калег і кліентаў стаіць на вашым боку, а хто — супраць, і якія ў іх на гэта прычыны. Заручыцеся падтрымкай — нават тых, з кім раней не мелі зносінаў.

Сітуацыя аўтынгу можа згуляць на карысць пацярпелага. Гэта магчымасць пераацаніць сваё асяроддзе, даведацца, каму можна давяраць, а каму не, а таксама раскрыць у сабе новыя граніцы ўпэўненасці і ўмацаваць рэпутацыю.

Вокладка: Даша Даўгаполава