Ёсць выпадкі, калі чалавек наступаў лужыну, дзе ляжалі абарваныя драты, і гінуў ад удару токам. Часцей за ўсё драты электраперадачы абрывае вятрыска або зламаныя ўраганам галіны. The Village Беларусь даведаўся, чаму ля аголенага дрота нельга рабіць вялікія крокі і як дапамагчы чалавеку, якога б'е токам.

Сяргей Емельянаў

лекар-рэаніматолаг

Звычайна драты абрываюцца ў выніку моцных віхур і ўраганаў. Калі вы бачыце аголены дрот, які не ўяўляе ніякай пагрозы, не трэба да яго падыходзіць. Калі ж дрот ляжыць на чалавеку, то можна паспрабаваць яго прыбраць. Але перад гэтым варта патэлефанаваць у аварыйную службу энергасетак, каб яны абясточылі лінію дратоў.

Каля аголенага дрота моцнае напружанне, якое ідзе па зямлі і вадзе — яно называецца крокавым напружаннем, — таму ні ў якім разе нельга рабіць вялікія крокі і наагул адрываць ногі ад зямлі. Інакш з-за розніцы ў напружанні паміж вашымі нагамі, вас ударыць токам. Пераступайце вельмі паволна, цягнучы ногі. Калі наблізіцеся да пацярпелага чалавека, дык прыбярыце провад сухой палкай даўжынёй не менш за метр. Мокрай палкай гэтага рабіць ні ў якім разе нельга, толькі сухой: яна не праводзіць ток.

Калі побач з пацярпелым шмат вады, дык набліжацца не раю. Адзіны варыянт — падкладаць пад сябе сухую вопратку і павольна падпаўзаць. Але ні ў якім разе не дакранайцеся да пацярпелага рукамі.

Зразумець, што чалавека б'е токам, можна паводле некалькіх прыкмет. У пачатку ўдару чалавека б’е сутарга: усе мышцы рэзка скарачаюцца, можа тачыцца пена з рота, і ён валіцца з ног. Пасля гэтага цягліцы могуць заставацца напятыя, а сам чалавек як быццам увесь выгнуты. Але вы можаце гэтага не ўбачыць, можа не быць наагул ніякіх знешніх прыкмет, таму заўсёды варта азірнуцца — раптам побач ляжыць аголены дрот. Ток з такіх дратоў забівае мужчыну сярэдняга целаскладу за некалькі секунд. Чым большая маса цела, тым больш шанцаў выжыць пад пастаянным токам.

Пасля таго як вы адпрэчылі дрот, варта даць чалавеку першую дапамогу. Калі чалавек жывы, перавярніце яго на бок. Калі ён не дыхае, дык закіньце галаву назад, расшпіліце яму каўнер, вызвальце ​​брушную паражніну і рабіце рэанімацыйныя захады.

Обложка: Khara Woods/unsplash.com