Похоже, празднования годовщины БНР в Минске не будет: Заявление организаторов

«Сябры, сёння была атрыманая канчатковая адмова па ўсіх годных пляцоўках для святкавання Дня Волі 2019. Мы, арганізатары БНР100, да апошняга намагаліся, каб беларусы зноў маглі годна адсвяткаваць 101-годдзе БНР, як і ў мінулым годзе – вялікай імпрэзай. Але паўгады перамоваў, спробаў знайсці кампраміс не дапамаглі.

Пабачыўшы летась дзясяткі тысяч беларусаў каля Опернага Тэатра, улады спужаліся паўтору і забаранілі маштабнае святкаванне ў цэнтры гораду, а Лукашэнка публічна паслаў нас усіх на Бангалор.

Наша каманда вырашыла адмовіцца ад пляцоўкі на Бангалор (і іншых падобнага кшталту) па наступных прычынах:

1. Бангалор не адпавядае маштабу і характару імпрэзы, і прапанова святкаваць незалежнасць сваёй краіны там – гэта знявага для беларусаў, для якіх важныя каштоўнасці свабоды і незалежнасці. Перыферыйныя пляцоўкі кшталту Бангалор былі створаныя для лакалізацыі дробных палітычных пратэстаў. Нацыянальныя святы вартыя месцаў у цэнтры гораду.
2. Пляцоўка тэхнічна не змяшчае больш за 3000 чалавек. Гэта проста небяспечна, калі людзей будзе больш. Раней на акцыі збіраліся некалькі тысячаў чалавек, іх пад канвоем адпраўлялі на Бангалор, а сотні тысячаў сачылі за падзеямі онлайн. Але нас стала больш. Для параўнання, у 2018 годзе на пляцоўцы каля Опернага адначасова было больш за 11 000 чалавек, а ўсяго за дзень прайшло праз усе ўваходы – каля 50 000.

Сыходзячы з гэтага:

1. Мы лічым забарону святкавання 101-ых угодкаў БНР у цэнтры гораду палітычна матываванай, якая кажа пра няздольнасць уладаў весці дыялог з грамадзянскай супольнасцю і знаходзіць кампрамісы дзеля такіх каштоўнасцяў, як дэмакратыя і незалежнасць нашай краіны.
2. Мы заяўляем, што нашая каманда і пасля 25 сакавіка працягне пачатую год таму справу па ўмацаванні незалежнасці Беларусі і ўшанаванню Беларускай Народнай Рэспублікі, мы будзем намагацца ўсталявання памятнай шыльды БНР, як тое абяцалі ўлады яшчэ год таму, папулярызаваць беларускую культуру, гісторыю, мову праз усе магчымыя пляцоўкі і даступныя нам каналы камунікацыі.
3. Мы прапануем правесці святкаванне 101-ых угодкаў БНР у любым выпадку, у Менску, іншых гарадах Беларусі і па ўсім свеце, офлайн і ў Інтэрнэце. Для гэтага мы распрацавалі магчымыя варыянты дэцэнтралізаванага святкавання, і кожны беларус зможа ў ім узяць удзел».

Святочны канцэрт у Горадні

Другая сталіца БНР у гэтым годзе стане адным з галоўных цэнтраў святкавання. 23 сакавіка ў Каложскім парку, з 13:00 па 17:00 адбудзецца святочны мітынг і канцэрт.

Як яшчэ можна ўзяць удзел?

• Прынесці кветкі
  У любы час 25 сакавіка прынесці кветкі да дому на Валадарскага 9 г. Менску, дзе была падпісаная 3-ая ўстаўная грамата БНР.
• Адсвяткаваць у любой установе
  Можна склікаць сяброў ды блізкіх увечары ва ўстановы вашага гораду, а ў 21:00 выйсці паглядзець на нацыянальны салют.
• Наведаць мітынг 24 сакавіка ў Менску
  Некалькі палітычных партыяў на чале з сацыял-дэмакратычнай БСДП падалі заяўку на мітынг напярэдадні свята – 24-ага сакавіка. Далучыцца можа кожны.

Мы самі можам замацаваць новыя традыцыя святкавання важнай гістарычнай даты – Дня незалежнасці БНР. Спадзяемся, што з кожным годам усё больш і больш беларусаў будуць лічыць сябе датычнымі да сваёй гісторыі. Гэты дзень не мусіць залежыць ані ад жаданняў і настрою ўладаў, ані ад меркаванняў палітычных сілаў. Будзем ганарыцца сваёй краінай, падтрымайма Дзень Волі ў любым фармаце, і самае галоўнае – святкуйма не зважаючы ні на што!