Кватэры ў пяціпавярховіках ды іншых панэльках заўжды былі небездакорныя. Іх будавалі, каб хутчэй рассяліць гараджан па асобных кватэрах. Пра ўтульнасць і прыгажосць думалі ў апошнюю чаргу. Але ўсё ж думалі. Бо з якіх яшчэ прычын паміж кухняй і ванным пакоем магло з'явіцца акно? Думкі аб яго прызначэнні не даюць спакою. The Village вырашыў разабрацца, у чым цымус гэтага горадабудаўнічага рашэння, і задаў пытанне доктару архітэктурных навук.

ЮРЫЙ АЛЯКСЕЕЎ, прафесар Нацыянальнага даследчага Маскоўскага дзяржаўнага будаўнічага універсітэта, сябар Саюза архітэктараў Расіі

Ёсць найменей тры прычыны з'яўлення акна паміж ванным пакоем і кухняй у пяціпавярховіках. Па-першае, малыя памеры кухні і санітарна-тэхнічных кабін (ваннага пакою —заўвага The Village) патрабавалі раскрыцця прасторы. Акно дазваляла візуальна яе пашырыць.

Па-другое, гэта дадатковае асвятленне на выпадак адключэння электрычнасці. Па-трэцяе, з дапамогай акна спрабавалі пазбыцца нястачы сувязі са знешнім асяроддзем. Наогул, малыя плошчы памяшканняў праекціроўшчыкі планавалі кампенсаваць якасцю ўпарадкавання прылеглай да дома тэрыторыі, але гэтага не атрымалася. Не атрымалася і звязаць кватэру з прылеглай да дома прасторай.

Стаўленне да вокнаў у архітэктараў дваякае. Сяму-таму падабаецца дадатковае асвятленне. У некаторых кватэрах пры сонечным надвор'і можна карыстацца ванным пакоем нават без асвятлення. Вокны робяць жыццё лягчэйшым людзям, якія пакутуюць на клаўстрафобію. А вось для бяспекі іх наяўнасць мала што дае.

Цяпер такіх вокнаў ужо не робяць. Па-першае, у новых дамах санітарна-тэхнічныя кабіны досыць вялікія. Кардынальна розніцца і прынцып праектавання. Зараз «кухня і спальня - вакол прыбіральні»: сантэхнічныя кабіны размешчаныя ўсярэдзіне, і туды святло навакольнага асяроддзя не патрапляе. Гэтага і не трэба. Якаснае штучнае асвятленне, прыгожыя матэрыялы, камфортнае абсталяванне, вентыляцыя — тэхнічныя сродкі забяспечваюць утульнае знаходжанне ў кватэры.

ТЭКСТ: Віктар Фешчанка

IЛЮСТРАЦЫЯ: Насця Яравая