Сёння разбіраемся ў тым, як правільна звяртацца да незнаёмых людзей.

Ні ў якім разе нельга звяртацца да каго б там ні было па гендэрнай прыкмеце («Жанчынка!», «Мужчынка!» і да таго падобнымі зваротамі). Гэта няветліва і непрыгожа. Калі па гендэрнай прыкмеце звярнуліся да вас, адкажыце, робячы выгляд, нібыта нічога не адбылося. Не варта паказваць, што вам непрыемна.

На жаль у нашай краіне не надта пашыранае прыгожае і ветлівае абыходжанне з незнаёмымі — аналаг англійскага «місіс», «містэр», французскага «мадам», «месье». У беларускай мове ёсць цудоўныя звароты «спадар» і «спадарыня», але яны не вельмі распаўсюджаныя ў сучаснай Беларусі. Звяртацца так да людзей у паўсядзённым жыцці не заўжды атрымліваецца. Таму раім нейтральныя звароты «прабачце», «даруйце», «прашу прабачэння». Да афіцыянтаў лепш звяртацца «будзьце ласкавыя». Паколькі абслугоўваць вас — гэта іх праца, слова «прабачце» выкарыстоўваць не варта. Затое можна падняць руку на знак прыцягнення ўвагі.

Калі вы ўсё ж хочаце выкарыстоўваць ветлівыя беларускія звароты, дык трэба памятаць некаторыя правілы. Да жанчыны і мужчыны ў вялікіх гадах лепш звярнуцца «шаноўная спадарыня» і «шаноўны спадар». Зварот «красуня» выкарыстоўваць не варта, бо ён падкрэслівае гендэрную прыкмету. Слова «даражэнькі» і «даражэнькая» можна ўжываць у адносінах да ўжо знаёмых, блізкіх людзей.

Тэкст: Віктар Фешчанка

Ілюстрацыя: Насця Яравая