Ці знойдзецца хоць адзін чалавек, у хатнім архіве якога няма здымкаў з гнятліва чырвонымі вачыма? The Village Беларусь вырашыў даведацца ў прафесійнага фатографа, чым гэты эфект патлумачыць.

Дзмітрый Верхалат

фатограф

Чалавечае вока — своеасаблівае люстэрка, якое адлюстроўвае светлавыя хвалі, тыповы адбівальнік святла. Святло выбліску, праходзячы скрозь сеткавіцу, адбіваецца ад вочнага дна, якое, як, зрэшты, шмат што ў нашым арганізме, мае даволі непрывабны выгляд і ўяўляе сабой суплёт з крывяных сасудаў. Крышталік факусуе адлюстраваныя прамяні ад вочнага дна, не даючы рассейвацца па ўсім вочным яблыку, і раёк афарбоўваецца ў інтэнсіўны чырвоны колер.

Вядома таксама, што патрапіўшы на прадмет, частка прамянёў паглынаецца, а частка адбіваецца. Менавіта адлюстраваныя прамяні, так бы мовіць, ствараюць колер прадмета. А ў дадзеным выпадку ад вочнага дна адлюстроўваюцца прамяні чырвонага дыяпазону, што і фіксуе фотаапарат.

Цікава, што насычанасць чырвонага на здымку залежыць ад адметнасцяў кожнага, гэта значыць ад колькасці пігменту і структуры крышталіка, таму эфект чырвоных вачэй ва ўсіх праяўляецца па-рознаму. Але нават калі камусьці і пашанцавала больш, цалкам гэтага эфекту пазбегнуць немагчыма, бо гэта з’ява, якая тлумачыцца натуральнымі законамі фізікі.

Каб звесці пабочны эфект да мінімуму, можна змякчыць выбліск белай паперай або тканінай ці ж прапанаваць мадэлі адвесці позірк трохі ўбок.

ТЭКСТ: Ліза Любавіна

Ілюстрацыя: Насця Яравая