Ёсць пытаннеЦі можна сказаць блізкаму чалавеку, што ён дрэнна выглядае?

У нашым грамадстве прысутнічае нейкае зачараванне светам прыгажосці, з гэтым звязана высокая папулярнасць глянцавых часопісаў. Пры гэтым праблема знешняга выгляду і залішняе вагі не да канца асэнсаваныя. Паводле нашых звестак відаць, што большасць людзей лічыць падобную заўвагу дапушчальнай. Але ў маладых людзей праблема знешняга выгляду стаіць больш востра, таму амаль дзве пятых рэспандэнтаў лічаць, што крытыкаваць знешні выгляд блізкага чалавека нельга. Хутчэй за ўсё, яны лічаць гэта праявай непавагі і парушэнне асабістай прасторы.

Аднак пытанне, напрыклад, збыткоўнай вагі можна разглядаць не толькі з пазіцыяў этыкі, але і з пункту гледжання здароўя блізкага чалавека. Нашы даследаванні паказваюць, што больш адукаваныя людзі не лічаць падобную заўвагу праявай бестактоўнасці: 75% называюць яе дапушчальнай, бо яе можна тлумачыць праявай клопату. У групах з нізкім спажывецкім статусам 36% лічаць, што гаварыць аб залішняй вазе чалавека нельга. Гэта значыць, што для людзей з нізкім узроўнем жыцця якасная медыцына менш даступная і ў іх няма магчымасці сачыць за сабой. Адпаведна, у іх ёсць нейкая псіхалагічная забарона: навошта рабіць падобныя заўвагі, калі ў чалавека мала рэсурсаў для таго, каб глядзець сябе і весці здаровы лад жыцця.

Калі чалавек набраў вагу, пра гэта абавязкова трэба сказаць. Ніхто, акрамя блізкіх, не можа аб'ектыўна ацаніць рэальную карціну. Важна разумець, што сярод людзей са збыткоўнай вагой вельмі мала здаровых людзей. Чым вышэйшая вага, тым вышэйшая верагоднасць развіцця самых сур'ёзных захворванняў — гэта навукова пацверджаны факт. Так, паводле прагнозаў Сусветнай арганізацыі аховы здароўя, да 2025 года 40% мужчын і 50% жанчын у свеце будуць мець залішнюю вагу і азнакі атлусцення. Статыстыка стасоўна дзецей не менш сумная, усё часцей нараджаюцца буйныя дзеці, часцей мы сустракаем дзяцей са збыткоўнай вагой. У сваю чаргу, залішняя вага, атлусценне — адзін з асноўных фактараў рызыкі развіцця сардэчна-сасудзістых захворванняў і цукроўкі другога тыпу. Каля 90% хворых з залішняй вагой і атлусценнем рана ці позна будуць мець цукровы дыябет другога тыпу, больш за 36% людзей, якія пакутуюць ад атлусцення, непрацаздольныя, каля 43% жанчын няплодныя, дзве траціны мужчын маюць сур'ёзныя праблемы ў полавой сферы і шмат чаго іншага. Адпаведна, менавіта блізкія людзі яшчэ на раннім этапе павінны заўважыць павелічэнне вагі і дапамагчы чалавеку змяніць лад харчавання і жыцця. У выпадках, калі гэта ўжо робіцца немагчымым, варта звярнуцца па дапамогу да спецыялістаў, не чакаючы развіцця згаданых вышэй праблем.

Я не бачу нічога дрэннага ў тым, каб даць параду блізкаму чалавеку і звярнуць яго ўвагу на актуальную праблему. Важна толькі зразумець, ці стае ў вас на гэта кампетэнцыі, ці аб'ектыўнае ваша меркаванне і з якой мэтай вы ўсё гэта робіце. Калі вамі рухае шчырае жаданне зрабіць чалавека лепш, чаму б і не. Будзьце ўважлівыя і пяшчотныя — часам непрывабны вонкавы выгляд з'яўляецца адлюстраваннем больш істотнай праблемы. Тактоўнасць, слушна абраны момант і сардэчнасць дазволяць выказаць любыя заўвагі і застацца пачутым.

Каб даць савет, трэба вызначыцца з характарам праблемы. Калі ваша сяброўка выпадкова пераблытала дзіцячы ранішнік з вясельным дзявочнікам у стрып-клубе «Эгаістка», размова будзе адна. Эпізадычная сітуацыя дазваляе пракаментаваць становішча напрасткі і амаль без сантыментаў. Галоўнае — з пачуццём гумару і такту: «Табе не здаецца, што чорная памада трохі too much для знаёмства з будучай свякрухай?», «У мяне ёсць адчуванне, што ў гэтай доўгай ваўнянай спадніцы табе будзе нязручна каракаскацца на матацыкл». Далей развіваць тэму не трэба, нават калі моцна хочацца. Важна навесці чалавека на правільныя высновы, зрэшты, апошняе рашэнне ўсё роўна за ім. Іншая размова, калі праблемы са знешнім выглядам ёсць у вашага партнёра і ў іх зусім не стыхійны характар. Аднак майце на ўвазе — гэтая гульня будзе доўгая і пакутлівая. Старыя трэнікі з выцягнутымі каленкамі і пенсіянерскія кофты колеру рудой лістоты на рэдкасць жывучыя і дзеяздольныя. Таму запашвайцеся цярпеннем, разуменнем і промністай дабрынёй. Душыце на дысананс яго брутальнай, прывабнай натуры са швэдрам, які цётка Ніна прывезла з Салігорска тры гады таму. Тонка намякнуць, што туфлі з квадратным носам моцна псуюць яго боскія ступакі, а ад яго старой клятчастай кашулі чамусьці заўсёды падае ваша лібіда. Вазьміце за аснову формулу “крок наперад, два назад". Не забывайце шчодра хваліць бойфрэнда за першыя модныя перамогі і кажаце як мага больш прыемных слоў. Толькі ў такіх умовах любы зможа здабыць упэўненасць і з цягам чау змяніць свой стыль.