У Мінску з 10 па 17 мая ў кінатэатры «Мір» пройдзе 5–ы фестываль кіно Паўночных і Балтыйскіх краін «Паўночнае ззянне». У праграму ўваходзяць 18 гульнявых і дакументальных фільмаў, рэтраспектыва, дзіцячая праграма «Ззя-kids», а таксама каля 10 мерапрыемстваў індустрыйнай платформы. Поўную праграму неўзабаве можна будзе паглядзець на сайце фестываля northernlightsff.com.

Традыцыйна «Паўночнае ззянне» прадстаўляе фільмы з Швецыі, Нарвегіі, Даніі, Фінляндыі, Ісландыі, Эстоніі, Літвы, Латвіі і сёлета. У мінулым годзе арганізатары прывозілі фільм з Фарэрскіх астравоў, сёлета ўпершыню пакажуць стужку з Грэнландыі.

Уся праграма спецыяльна да 5-годдзя падабраная такім чынам, што адпавядае сёлетняй канцэпцыі «Усё магчыма». Акрамя гэтага, значную частку праграмы складаюць дакументальныя фільмы, і таксама роўна палова фільмаў асноўнай праграмы знятая жанчынамі.

Сёлета «Паўночнае Ззянне» ўключае ў сябе 18 фільмаў асноўнай праграмы з Паўночнаеўрапейскіх і Балтыйскіх краін. Упершыню пакажуць анімацыю і сферычныя фільмы, а таксама гульнявы фільм з Грэнландыі. Таксама плануецца рэтраспектыва і варкшопы для дакументалістаў і шмат іншых падзей з удзелам замежных гасцей у межах індустрыйнай платформы «Паўночнага ззяння».

Усе фільмы праграмы «Паўночнага ззяння» — беларускія прэм’еры. Але сусветныя прэм’еры гэтых фільмаў адбыліся на розных буйных кінафестывалях па ўсім свеце.

Упершыню да свайго дня народзінаў, які будуць адзначаць 12 і 16 мая, ў Мінскім Планетарыі адбудуцца паказы сферычнага кіно пра сапраўднае Паўночнае ззянне.

Літоўская і нарвежская анімацыя з беларускай агучкай у межах новай дзіцячай праграмы «Ззя-kids» – стане добрым сюрпрызам для дзіцячага і сямейнага прагляду, а таксама прыкметай росту кінафестывалю. Так, 11 мая адбудзецца паказ мультфільма «Якаб, Мімі і сабакі, якія размаўляюць» легенды латвійскай анімацыі Эдмундса Янсанса, які распавядае пра прыгоды хлопчыка ў самым аўтэнтычным раёне Рыгі. А 12 траўня адбудзецца паказ нарвежскага мультфільма «Вясёлая ферма» пра карову, якая марыла стаць зоркай-спявачкай. Як бачыце – усё сапраўды магчыма!

У праграме «Паўночнага ззяння» вялікая ўвага надаецца важным і актуальным тэмам для сусветнай і беларускай грамадскасці. У гэтым годзе пасля прагляда стужкі «Вакацыі» адбудзецца адкрытая размова на тэму сузалежных адносінаў, гвалту і таго, як не патрапіць у сітуацыю, пра якую ідзе гаворка ў фільме. У дыскусіі возьмуць удзел эксперты і эксперткі, а таксама рэжысёрка фільма Ізабэлла Эклёф, якая вядомая, як сусцэнарыстка шведскага фільма Border рэжысёра Алі Абасі, які атрымаў галоўную ўзнагароду ў Канах у конкурсе «Асаблівы погляд»–2018.

Таксама ў межах індустрыйнай платформы «Паўночнага ззяння»:

● майстар клас ад добрага сябра фестывалю і трохразовага намінанта на Оскар эстонскага кінапрадзюсара Іва Фэльта пра тое, як арганізаваць Оскараўскую кампанію і колькі гэта каштуе;

● воркшоп ад рэжысёркі Сесіліі Б’ёрк і прадзюсара Максіміліяна ван Аертрука з Швецыі пра тое, як працуе самая прагрэсіўная кінакампанія ў краіне (Гётэборг), сузаснавальнікам якой з’яўляецца рэжысёр Рубэн Эстлунд («Квадрат», «Форс-мажор» і інш.), і іх філасофію выкарыстання выяваў у кінематографе;

● адкрытая лекцыя пра кіно і культуру Грэнландыі, і пра тое, як выглядае кінавытворчасць у такой невялікай краіне, ад акторкі фільма «Аноры» Нукакі Костар-Вальдаў. «Аноры» з’яўляецца першай поўнаметражнай стужкай у Грэнландыі, якую зняла і спрадзюсавала жанчына;

● Скаўцінг дакументальных праектаў ад B2B DOC (Baltic to Black Sea Documnetary Network) сумесна з «Паўночным ззяннем», куды запрашаюцца ўсе беларускія дакументалісты з праектамі, якія маюць міжнародны патэнцыял і трэйлер з англійскімі субтытрамі. Найлепшыя праекты будуць запрошаныя на праграмы B2B DOC і падтрыманыя ў развіцці і пошуку міжнародных магчымасцяў.

«Усё магчыма!» – арганізатары звяртаюць вашую ўвагу на бязмежныя магчымасці чалавека ў гэтым свеце! Так, магчыма рабіць незалежны кінафестываль у Беларусі вось ужо 5 гадоў, магчыма размаўляць адкрыта на складаныя тэмы, знаходзіць рашэнні канфліктаў, весці дыскусію з пазіцыі win-win і паважаць адзін аднаго. Сёлетняя місія фестывалю — натхніць беларусаў рухацца наперад, усміхацца і прыслухоўвацца да сябе.

Арганізатар: Офіс Савета Міністраў Паўночных краін у Літве (norden.lt).

Суарганізатары: Пасольства Наврегіі ў Кіеве, Дацкі Інстытут культуры ў Літве, Латвіі і Эстоніі, тэлеканал «Настоящее время», УП Кінавідэапракат Мінгарвыканкама - «КиноМинска», кампанія Volia Films.