Часткай кінафестывалю «Паўночнае ззянне», які пройдзе ў Мінску з 10 па 17 мая ў кінатэатры «Мір», стануць анімацыйныя фільмы з беларускай агучкай і мерапрыемствы спецыяльна для дзяцей. Новая праграма «Ззя-kids» будзе праходзіць 11 і 12 мая.

Сёлета арганізатары пашыраюць межы сваёй праграмы — не толькі ўзроставыя, але і тэматычныя. Так, пакажуць анімацыйны фільм латвійскага рэжысёра Эдмунса Янсанса «Якаб, Мімі і сабакі, якія размаўляюць». Таксама пакажуць нарвежскую анімацыйную стужку «Вясёлая ферма» ад рэжысёркі Лізэ Усволл.

У межах новай праграмы для дзяцей і іх бацькоў падрыхтаваныя два мерапрыемствы для сумеснага уікэнда. Так, 11 мая ў 13:30 распачнецца майстар-клас «Горад будучыні» для малодшай аўдыторыі фестывалю і іх бацькоў. Рэкамендаваны ўзрост — 7–12 год. Якім бачаць дзеці свой горад будучыні? Удзельнікі майстар-класу змогуць разам пафантазіраваць на тэму ідэальнага свету, экалагічнага гарадскога асяроддзя, дзе шчасліва жывуць усе людзі і кожны знаходзіць свой утульны куток. Вядучая — Дыяна Рафальская, архітэктар жылых і грамадскіх будынкаў, эксперт Мінскай урбаністычнай платформы, аўтар творчых курсаў і выкладчык малявання для дзяцей і дарослых. Мерапрыемства адбудзецца ў прасторы Zal #2 у галерэі «Арт-Беларусь» (вуліца Казлова, 3). Уваход платны (5 рублёў), патрэбная папярэдняя рэгістрацыя па спасылцы. 

У 15:00, пасля майстар-класу, ў кінатэатры «Мір» упершыню за гісторыю фестывалю будзе паказаная анімацыя! Латвійская стужка «Якаб, Мімі і сабакі, якія размаўляюць», рэжысёра Эдмундса Янсанса будзе прадэманстраваная на латвійскай мове з беларускай агучкай. За аснову сцэнарыя была ўзятая кніга латышскай пісьменніцы Луізы Пастрорэ «Гісторыя Маскачкі» — пра прыгоды сабакаў, якія размаўляюсь, і іх незвычайнае сяброўства з дзецьмі.

Дзіцячая праграма «Ззя-kids» на наступны дзень распачнецца з майстар-класу «Справа мары», які таксама рэкамендаваны для дзетак 7–12 год. На майстар-класе маленькія ўдзельнікі паразважаюць, якія прафесіі з’явяцца праз 10 ці 15 год, а хто аб чым марыць ужо зараз. Вядучая — Валерыя Манковіч, дызайнер і каміксіст, выдаецца ў Беларусі. Мерапрыемства пачынаецца ў 13:30 і таксама адбудзецца ў прасторы Zal #2 у галерэі «Арт-Беларусь» (вуліца Казлова, 3). Уваход платны (5 рублёў), патрэбная папярэдняя рэгістрацыя па спасылцы. 

У той жа дзень, 12 мая, у 15:00 у кінатэатры «Мір» адбудзецца паказ нарвежскай анімацыйнай стужкі «Вясёлая ферма» рэжысёра Лізэ Усволл. Фільм дэманструецца на нарвежскай мове з беларускай агучкай. Гэта паўнаметражны фільм пра маленькую карову, якая марыла стаць рок-зоркай.

Квіткі на паказы анімацыйных фільмаў з праграмы «Ззя-kids», а таксама на ўсе іншыя фільмы праграмы «Паўночнага ззяння – 2019», можна набыць на bycard.by

Арганізатар: Офіс Савета Міністраў Паўночных краін у Літве (norden.lt).

Суарганізатары: Пасольства Наврегіі ў Кіеве, Дацкі Інстытут культуры ў Літве, Латвіі і Эстоніі, тэлеканал «Настоящее время», УП Кінавідэапракат Мінгарвыканкама — «КиноМинска», кампанія Volia Films.