25 і 26 траўня ў кінатэатры «Мір» у рамках фестывалю кіно Паўночных і Балтыйскіх краін «Паўночнае ззянне» адбудзецца дадатковы паказ дзвюх кінастужак: дацкага фільму «Вакацыі» пра гвалт і сузалежныя адносіны і ісландска-украінскага «Жанчына абвяшчае вайну».

Міжнародная прэм’ера фільма Бенедыкта Эрлінгсана «Жанчына абвяшчае вайну» адбылася на Міжнародным Канскім кінафестывалі ў 2018 годзе. Там стужка была ўзнагароджана галоўным прызам у праграме «Тыдзень крытыкі». 

Фільм рассказывает пра Хатлу, пяцідзесяцігадовую абаронцу навакольнага асяроддзя, якая аб’яўляе вайну мясцовай алюмініевай прамысловасці Ісландыі. Калі яе дзеянні становяцца ўсё больш рашучымі, яе жыццё цалкам пераварочваецца — атрымлівае дазвол на ўдачарэнне маленькай дзяўчынкі з Украіны.

У здымках удзельнічалі вядомыя ісландскія музыканты і ўкраінскі народны жаночы хор. Здымкі ішлі на працягу 8 тыдняў на тэрыторыі Ісландыі і Украіны.

Гульнявы фільм рэжысёркі Ізабэлы Эклёф «Вакацыі» распавядае пра маладую сэксуальную дзяўчыну, якая апынулася ў гвалтоўных стасунках з багатым мужчынам-наркабаронам, і закранае тэмы ролі і становішча ахвяры, матываў гвалту, таго, як і чаму гвалт адбываецца і кім падтрымліваецца. Сусветная прэм’ера адбылася на кінафестывалі Sundance і выклікала шмат дыскусій у Швецыі і Даніі.

Паказ стужкі «Жанчына абвяшчае вайну» адбудзецца 25 траўня ў 20:20. «Вакацыі» можна будзе паглядзець 26 траўня ў 20.20.  ​Фільмы дэманструецца на мове арыгіналу з беларускімі субтытрамі.