Аўтар бестселераў “Радзіва Прудок” і “Прэм’ера” Андрусь Горват да ўзлёту літаратурнай кар’еры працаваў дворнікам у Купалаўскім тэатры. 21 верасня, падчас Тэатральнага пікніка, прысвечанага 100-му сезону Купалаўскага, Горват на ўвесь дзень вернецца на работу. Вядомы пісьменнік будзе сачыць запарадкам у Аляксандраўскім скверы і нават правядзе некалькі экскурсій пазакуліссі тэатра ў сваім амплуа.

Біяграфія Андруся Горвата падобная да тэатральнай легенды, аднак гэта рэальная гісторыя, якой ганарацца купалаўцы. Некалі на працу дворніка ў тэатр уладкаваўся журналіст-фрылансер Андрусь. Цягам працоўных будняў ён назіраў за тэатральнай дзейнасцю, натхняўся творчасцю і аднойчы вырашыў кардынальна змяніць жыццё. Андрусь з’ехаў у вёску Прудок на Палессі аднаўляць дом свайго дзеда. Жыццё ў палескай вёсцы моцна адрознівалася ад гарадскога, і былы дворнік Купалаўскага занатоўваў цікавосткі на сваёй старонцы ў Facebook. Пазней допісы ператварыліся ў кнігу “Радзіва Прудок”, першую тысячу асобнікаў якой чытачы раскупілі цягам 2-х дзён. Паводле гэтага твора Купалаўскі тэатр паставіў спектакль, а Горват напісаў новую кнігу “Прэм’ера” – пра тое, як Купалаўскі паставіў спектакль па яго творы. Першыя наклады “Прэм’еры” разышліся яшчэ хутчэй. 

На свяце, прысвечаным 100-му сезону Купалаўскага, можна будзе наведаць тэатральнае закуліссе. Экскурсіі пачнуцца з 12-й гадзіны дня, некалькі з іх правядзе Андрусь Горват. Наведвальнікі даведаюцца, як ствараюцца дэкарацыі да спектакляў, дзе шыюцца касцюмы, колькі часу і грыму трэба на тое, каб падрыхтаваць акцёраў да выступу і многае іншае. Акрамя таго, на Тэатральным пікніку ўпершыню можна будзе пабачыць спектакль Купалаўскага пад адкрытым небам: “Радзіва Прудок” будуць трансляваць з тэатральнай сцэны ў жывым эфіры.

Праграма свята пачнецца а 12:00 і працягнецца да 23:00. Госці змогуць пачаставацца ў street-буфеце, зрабіць сабе вусы як у маладога Купалы, амаладзіцца або састарыцца ў грымёрцы “ФэйсАп”, атрымаць запрашэнні на закрытыя паказы спектакляў і нават шанец выйсці на сцэну Купалаўскага. Уваход вольны. Зарэгістравацца на эскскурcію можна на сайце Купалаўскага.