Джэлата — італьянскае марозіва. Галоўнае адрозненне джэлата ад звычайнага марозіва — прапорцыі складнікаў і спосаб прыгатавання. Джэлата робіцца крыху даўжэй і патрабуе безупыннага мяшання, за кошт гэтага тэкстура ў яго атрымліваецца больш крэмавая, цягнючая і мяккая. Трымайце спосаб прыгатавання джэлата, каб у маразілцы заўсёды быў запас свойскага марозіва, а пад рукой — пачастунак для гасцей.

Італьянскае джэлата адрозніваецца ад звычайнага марозіва, па-першае, меншай тлустасцю, па-другое, тэхнікай змешвання. Адмысловыя машыны асаблівым чынам змешваюць марозіва ў працэсе замаразкі, што дазваляе зрабіць джэлата гэдакім мяккім і тэкстурным. Але паколькі джэлата прыдумана ў ХVI стагоддзі, калі яшчэ не было аўтаматызаваных працэсаў, дык можна ўспомніць, як яго рабілі даўней, і прыгатаваць дома. Рэцэпт свойскага джэлата той самы, толькі бяруцца яечныя жаўткі, а прапорцыі малака і вяршкоў іншыя.

Свойскае джэлата атрымліваецца смачнае як на малочнай аснове, так і на вадзе. Можна эксперыментаваць і дадаваць да дэсерту кавы, мігдаловы арэх, фісташкі, ром, лікёры, цынамон ды ўсякае-іншае.

Складнікі для гатавання порцый джэлата «пламбір»

— яечны жаўток 1 штука

— суцэльнае малако — 350 мл

— дробны цукровы пясок — 100 г

— ванільны цукар — 1 пакуначак (10-12 г)

- халодныя тлустыя вяршкі — 150 мл

- шчопаць солі

СПОСАБ ПРЫГАТАВАННЯ

Малако з соллю, паловай цукровага пяску і ванільным цукрам заліць і засыпаць у коўш, памешваючы, прагрэць да распушчання цукру. Зняць з агню.

Узбіць жаўткі з рэштамі цукру да стану беласці і пухкасці. Памешваючы, пакрысе ўліць гарачае малако да жаўткоў. Пасля вярнуць сумесь у коўш і зноў прагрэць на малым агні, не даводзячы да каляхавання, да стану эмульсіі (яна не павінна згуснуць, адно стаць трохі шчыльнейшай, гэта можна спраўдзіць з дапамогай драўлянай лапаткі: вадкасць пачне сцякаць з яе павольней).

Да заваранага жаўтка дадаць халодныя вяршкі, змяшаць і асцюдзіць.

Халодную сумесь перакласці ў ёмістасць для марозіва, схаваць у маразілку. Цягам трох гадзін сумесь пажадана кожныя паўгадзіны памешваць. Затым пакінуць у лядоўні на адну-дзве гадзіны або на ноч. Праз 5-6 гадзін джэлата гатовае.

ФОТАЗДЫМКІ: Markus Spiske