Тэндэнцыі ў прычосках мяняюцца штогод, але адно застаецца нязменным: па вуліцах ходзяць пажылыя жанчыны з фіялетавым колерам валасоў. Адкуль пайшла такая мода, мы вырашылі высветліць у цырульніка Яўгена Зубава.

Яўген Зубаў

цырульнік

Любасць пажылых спадарынь да гэтага эпатажнага колеру можна растлумачыць некалькімі прычынамі. Па-першае, фіялетавы быў вельмі модным колерам у часы іх маладосці: у канцы 70-х літаральна ўсе шалелі ад гэтага адцення. Дамагчыся фіялетавага было ў тыя часы няпроста: спецыяльных фарбаў не існавала, таму светлавалосыя модніцы фарбавалі валасы атрамантам і капіркай. Зараз, калі можна зайсці ў краму і выбраць любое адценне, дастаць фіялетавую фарбу зусім нескладана. Акрамя таго, пажылыя спадарыні звычайна не сочаць за зменай тэндэнцыяў, жывучы паводле стандартаў прыгажосці свайго юнацтва. Напэўна, таму ім здаецца, што фіялетавы колер дагэтуль актуальны. Да таго ж з гадамі наагул жанчыны пачынаюць аддаваць перавагу больш зыркім і заўважным адценням: рудому, чырвонаму і фіялетаваму.

Па-другое, фіялетавы колер дапамагае максімальна схаваць жаўцізну сівізны, таму што з узростам яна часта перастае быць белай. Для гэтых мэтаў пажылыя спадарыні выкарыстоўваюць звычайна альбо кандыцыянеры з фарбавальнікамі, альбо шампуні з адценнем.

Фіялетавы колер валасоў атрымліваецца і таму, што пажылыя жанчыны фарбуюць валасы самі, дома і для гэтых мэтаў купляюць звычайныя спажывецкія фарбавальнікі. Яны іх не змешваюць. Не ведаючы ўсіх тонкасцяў гарманізацыі фарбаў (з якімі знаёмы цырульнік), фарбуюць тым, што ёсць. На сівыя валасы, пазбаўленыя пігменту, фарба кладзецца асабліва інтэнсіўна і зырка-фіялетавы колер атрымліваецца міжволі.

Ілюстрацыя: Насця Яравая