Сталічныя моднікі лічаць за лепшае нават у самую спякоту фарсіць па горадзе ў красоўках і кедах на босую нагу. А ці не шкодзіць гэта нагам? Мы звярнуліся да лекара-дэрматолага Андрэя Фёдарава і даведаліся, ці варта здраджваць сандалям з красоўкамі і ў што можа ператварыцца шпацыр па горадзе басанож.

Андрэй Фёдараў

Лекар-дэрматолаг

Ці можна хадзіць па вуліцах басанож? Насамрэч, галоўная небяспека палягае ў механічных пашкоджаннях. Ёсць небяспека параніць нагу каменьчыкам або шкельцам, туды патрапіць інфекцыя — і пачнецца заражэнне. Без раны ніякая зараза назе не пагражае. Вуліца — гэта не тое месца, дзе гуляе грыбок. Яго можна cхапіць толькі ў басейне, лазні, душавых кабінах, на драўляных пляжах ды ў іншых грамадскіх прасторах, дзе людзі звычайна ходзяць басанож.

Насамрэч самае жахлівае крыецца ў іншым — у нашэнні красовак, туфляў, кедаў на босую нагу. Скура ў такім абутку (нават калі ён з тканіны, як Converse, напрыклад) зусім не дыхае. Гэта таіць у сабе тры вялікія праблемы. Першая — гэта абвастрэнне грыбка. Часта бывае, што ён завёўся, але пакуль што на пачатковай стадыі і таму цалкам непрыкметны. У красоўках для яго ствараюцца цяплічныя ўмовы. Другая праблема — мазалі: нага пацее і пастаянна трэцца аб абутак. Нічога страшнага, аднак прыемнага таксама няшмат. Трэцяя праблема — гэта раздражненне ад лішку вадкасці на скуры, кшталту патніцы. Яно здараецца ад таго, што скура не можа ўвабраць або выветрыць вылучаны пот — і ад гэтага з'яўляецца пачырваненне.

Аптымальны варыянт у спякоту — насіць сандалі або басаножкі. Найбольшае, што вам пагражае, — гэта мазалі ад папружак.

Ілюстрацыя: Насця Яравая