Белыя інтэр'еры ўвайшлі ў моду, як толькі колькасць часу, што выдаткуецца на іх прыбіранне, стала прымальным. І хоць у некаторых галовах яшчэ засталася ўстаноўка «белыя сцены ўсё роўна як бальніца», вынаходніцтва пыласоса, жорсткай губкі і «Дамэстаса», а таксама татальнае замілаванне Скандынавіяй, зрабілі белыя інтэр'еры практычна паўсюднымі. The Village распавядае, чаму белы — гэта добрае рашэнне для кватэры і як зрабіць такі інтэр'ер самастойна.

Ганна і Міхаіл Кошалевы

дызайнеры

Што добрага ў белым інтэр'еры

У першую руку разбярэмся, чым усіх вабяць белыя інтэр'еры і чаму яны не выходзяць з моды. Па-першае, белы колер выяўляе ўсе брудныя месцы. Менавіта таму белай кватэры пад здачу будзе больш даверу (вядома, калі яна здаецца белай). Па сабе ведаем: у ванных пакоях з цёмнай пліткай раней ці пазней з'яўляецца адчуванне, маўляў, усе вакол бруднае, таму даглядаць за белымі інтэр'ерамі прасцей нават чыста псіхалагічна.

Другі важкі аргумент на карысць белага інтэр'еру — клімат. З нашай працягласцю светлавога дня і беспрасветнай воблачнасцю сонцам мы не разбэшчаныя. Перавага белага ў тым, што ён адлюстроўвае святло лепш за іншыя пафарбаваныя паверхні, і памяшканне з белымі сценкамі будзе святлейшае нават з маленькімі вокнамі.

Па-трэцяе, адно з правілаў гарманічнага інтэр'еру палягае ў адсутнасці рэзкіх межаў для колераў: чым больш стракатая ў вас кватэра, тым меншай яна здаецца. Таму беласнежныя інтэр'еры выглядаюць бясконцымі.

Па-чацвёртае, белы — ідэальны фон для карцін ды іншых драбязаў. І гэта тое, за што не любіць белы нельга. З цягам часам любы дом абрастае стыхійным пярэстым дэкорам: мілая бэзавая рамачка ад мамы, чырвоная статуэтка з падарожжа сяброў-арыгіналаў — усе гэтыя дарагія гаспадарскаму сэрцу рэчы белыя стэлажы далікатна злучаюць, і прастора ўжо не падаецца хаатычнай.

Што трэба ведаць, каб сабраць белы інтэр'ер

Насамрэч з пункту гледжання пераважнасці колеру для сценак белы інтэр'ер нічым не лепшы за каляровы: на ўсякі ўдалы белы знойдзецца не менш зграбны каляровы. Проста з белым складаней памыліцца. У любым выпадку, каб стварыць белы інтэр'ер як на малюнку, карысна ведаць некаторыя падводныя камяні.

 Роўныя сцены. Пра гэта, як правіла, у артыкулах пра інтэр'еры не пішуць, але якасць падрыхтоўкі сцен грае важную ролю: на нязграбна зробленай белай сцяне добра відаць вышчарбіны і расколіны, а чым больш лаканічная прастора, тым дэфекты больш заўважныя. Таму да мінімалістычных інтэр'ераў патрабаванні якасці рамонту мусяць быць вышэйшыя. Каб атрымаць не толькі роўныя (гэта залежыць ад майстроў), але і доўгатрывалыя сценкі, пасля працэсу тынкоўкі іх варта пакрыць армаванай сеткай, абавязкова зашпатляваць, зверху паклеіць шклопалатно і толькі потым фарбаваць.

 Плінтус на столі. Як правіла, сценкі ў нашых дамах жалезабетонныя, а столі з гіпсакардона. Але нават калі сценкі цагляныя, а столь — з жалезабетону, нюанс тут таксама ёсць. Увесь цымус у каэфіцыенце тэрмічнага пашырэння, які ў розных матэрыялаў розніцца. То бок, на стыку двух матэрыялаў раней ці пазней будзе расколіна. Таму абавязкова рабіце плінтус на столі — хай мінімальны, хоць бы 2х2 сантыметры. Або будуйце сцены з такога ж матэрыялу, што і столь.

 Камбінацыя колераў. Спалучаць колеры не так ужо складана. Вы, хутчэй за ўсё, не памыліцеся, калі будзеце прытрымлівацца простага правіла, якое пасуе для любой візуальнай задачы, не толькі для дамоў: 65-70% усёй прасторы павінна быць запоўненае базавым колерам (у нашым выпадку белым), 25-30% — дадатковым і прыкладна 5% — акцэнтнымі колерамі, якія павінны быць абавязкова, інакш атрымаецца нуднавата.

 Розныя фактуры. Каб белы інтэр'ер барані Божа не ператварыўся ў бальнічны, яго трэба напоўніць рознымі фактурамі: гладкім каменем, афарбаваным дрэвам, рэльефнымі шпалерамі, скурай, футрам і гэтак далей. Зіхочучы на ​​святле і па-рознаму адлюстроўваючы яго, такія паверхні візуальна напаўняюць інтэр'ер.

 Мэбля з каталогу колераў. Белы колер складанейшы, чым падаецца на першы погляд. Калі вы вырашыце укамплектаваць пакой белай мэбляй і будзеце купляць яе ў розных месцах, то, хутчэй за ўсё, хутка выявіце, што ваша белая мэбля не такая ўжо белая. Белых адценняў мноства: шарэйшая, жаўцейшая, бялейшая, а яшчэ ёсць дзевяць ступеняў глянцаванай, і ў кожнага вытворцы фарбы могуць быць свае, адметныя. У ідэале, вядома, рабіць мэблю на замову і сінхранізаваць брэнд фарбы ў розных вытворцаў. Парада з асабістага вопыту: калі вам давядзецца заказваць мэблю, то, каб атрымаць аптымальна белы колер, выбірайце ў каталогу RAL (палітра колераў, якой карыстаюцца мэбляры) нумар 9016. У параўнанні з астатнімі ён крыху жаўтаваты, але ў рэальным жыцці менавіта такі, які мае быць.

Падсумоўваючы, скажам, што белы інтэр'ер — гэта цалкам сапраўды прамежкавы этап. Мы з вамі прывыклі да пярэстых дзіцячых садкоў, рознакаляровых школаў і  аранжавых пад'ездаў, проста хочам балансу і робім свае кватэры спакайнейшымі ў процівагу ўсім, што атачае за межамі ўваходных дзвярэй. Аднойчы адчуванне суладдзя з навакольным асяроддзем з'явіцца, і мы станем спакойна ставіцца да складаных колераў таксама ў сябе дома.

ФОТАЗДЫМКІ: вокладка, 3, 5 — Міхаіл Кошалеў, 1 — Архітэктурнае бюро 4a Architekten, 2, 4 — Ганна Міхеева, 6 — Кацярына Заклівенец