Уражанне ад пакою ў першую чаргу залежыць ад асвятлення: правільнае святло падкрэсліць колеры і фактуры, разумнае занаванне дазволіць па-рознаму выкарыстоўваць прастору, а незвычайны свяцільнік стане яскравым акцэнтам. У падборцы The Village — пяць ідэй, якія дапамогуць зрабіць асвятленне ў доме функцыянальным і адметным.

Выкарыстанне дрота

Некалькі гадоў таму дызайнеры прыгадалі, што ў свяцільнікаў, акрамя плафона і лямпы, ёсць дрот, і сталі фарбаваць яго ў розныя колеры — сёння мінімалісцкія мадэлі з зыркімі дратамі прадаюцца паўсюль. Такі свяцільнік выдатна глядзіцца ў манахромным інтэр'еры, а каляровы дрот ад жырандолі можна завязваць ў вузлы або развешваць петлямі. Доўгі кантрасны дрот ад таршэра ці настольнай лямпы можна прымацаваць да сценкі, выклаўшы геаметрычную фігуру — гэта і сцяну аздобіць, і пазбавіць ад бязладдзя. Нарэшце, з дапамогай аднаго толькі драта, свяцільнік можна прымацаваць практычна куды заўгодна. Напрыклад, можна купіць звычайную кансоль, абматаць дрот вакол яе, замацаваўшы мэблевым стэплерам, — і маем лаканічнае бра.

Лямпы з падручных матэрыялаў

Плафон для люстры лёгка зрабіць самім, да таго ж гэта неабавязкова будзе мудрагелісты абажур у класічным стылі. Аматарам індустрыяльнай эстэтыкі варта перабраць кухонныя прылады: выдатная лямпа атрымаецца са старой эмаляванай варонкі, таркі ці звычайнага слоіка. Настольную лямпу можна амаль імгненна зрабіць з гірлянды, паклаўшы яе ў старасвецкі слоік ці вазу. Тую ж гірлянду можна абматаць вакол прыгожага доўгага карча або старых драўляных драбін — атрымаецца таршэр.

Групы свяцільнікаў

Замест таго каб вешаць у гасцёўні ці ў іншым прасторным пакоі грандыёзную класічную жырандоль, можна купіць шмат аднолькавых ці амаль аднолькавых невялікіх лямп і павесіць іх крыху нядбайным звязкам. Зарука поспеху — як след суаднесці колькасць і памер свяцільнікаў і даўжыню дратоў. Іншы ўдалы хітрык для вялікіх пакояў з высокай столлю — развесіць адразу некалькi падобных (ці, наадварот, вельмі розных) лямп групай, блізка адна да адной. Іх можна згуртаваць над круглым ці квадратным сталом у сталовым пакоі.

Лямпачкі Эдысана

Калі вы прыхільнік мінімалізму і нават самыя простыя плафоны і абажуры вас не задавальняюць, можна абыйсціся адной лямпай. Варта звярнуць увагу на мадэлі ў вінтажным стылі, падобныя да лямпы напальвання Эдысана, і на энэргазахавальную лямпу маркі Plumen, якая зусім не мае патрэбы ў плафоне.

Лямпы на шарніры

Рабочая лямпа і таршэр на шарнірах — рэч звыклая, а вось аналагічна сканструяваныя насценныя і стольныя свяцільнікі ў нас пакуль што рэдкасць. Да іх варта прыгледзецца: яны ідэальна пасуюць для асвятлення любой працоўнай паверхні, ад варштата да кухоннага стала, і не займаюць шмат месца. Замацаваўшы такую ​​лямпу на любой паверхні ў шатні, кухні або ванным пакоі, вы зможаце лёгка змяняць напрамак святла і вугал яго падзення.

Тэкст: Ксенія Ашчэпкава

Вокладка: Anthony Indraus