З аднаго боку, кватэра ў новабудоўлі — гэта файна: сучасны дом, утульная тэрыторыя, а калі вы яшчэ і набылі кватэру на пачатковым этапе будаўніцтва, то немалое ашчаджэнне. З іншага — пры куплі такога жытла паўстае шмат пытанняў: браць з рамонтам або без, на што звяртаць увагу ў выпадку вольнай планіроўкі, з чаго пачынаць рамонт і гэтак далей. Архітэктар Аляксей Іваноў распавёў The Village аб асноўных момантах, якія трэба браць пад увагу пры выбары кватэры ў новабудоўлі.

З чаго пачынаць пошукі?

Аляксей Іваноў

архітэктар-дызайнер, сузаснавальнік майстэрні Geometrium

Выбіраючы кватэру, у першую чаргу спытайце сябе, што для вас важна. Для сям'і з дзецьмі і для халасцяка патрэбныя розныя планіроўкі — як і для тых, хто працуе з дому, ці тых, хто ўвесь час знаходзіцца ў раз'ездах, а дадому прыязджае толькі пераночыць. З гэтае прычыны, перш чым купіць, уявіце, як праходзіць ваш стандартны будзённы або выходны дзень: што вы робіце ранкам (можа, вы любіце бегаць па раніцах, і таму важная наяўнасць парку), колькі часу вы гатовыя выдаткаваць на тое, каб дабрацца да працы, ці шмат часу вы праводзіце дома і гэтак далей.

Абавязкова абдумайце, дзе і ў які момант вы будзеце рабіць нешта разам са сваёй сям'ёй: гэта можа быць сумеснае прыгатаванне вячэры або чыстка зубоў з дзіцем у ваннай.

Што гэта дасць? Вы зразумееце, патрэбная вам вялікая гасцёўня ці ж, магчыма, вялікая кухня або спальня. Увогуле, расстаўце прыярытэты. Вы нават можаце скласці спіс усіх спраў, якімі вы так ці інакш будзеце займацца дома, і распісаць паэтапна іх выкананне — гэта дапаможа вам вызначыцца з неабходнымі зонамі ў кватэры.

Таксама пры выбары кватэры маюць значэнне вашыя мэты і перспектывы. Напрыклад, цяпер у вас дзяцей няма, але яны плануюцца — таму адразу глядзіце, дзе вы зробіце дзіцячы пакой. Або калі вы зараз збіраецеся пажыць у кватэры, а потым збіраецеся яе здаваць у арэнду, дык памяркуйце наперад, каму, і ўпарадкуйце яе так, каб людзям было ўтульна ў ёй жыць.

На што звяртаць увагу на агледзінах?

Ёсць некалькі параметраў, якія ў некаторых выпадках могуць стаць абмежаваннямі пры перапланіроўцы або рамонце:

 Размяшчэнне інжынерных сетак

Часта забудоўнікі распавядаюць, што ў кватэры прадугледжаная вольная планіроўка і можна размяшчаць пакоі як заўгодна. Насамрэч, гэта не заўжды працуе: на плане кватэры ў любым выпадку існуюць так званыя «мокрыя зоны» (кухня і санвузлы), размяшчэнне якіх строга рэгламентаванае. Да таго ж ні кухню, ні ванны пакой нельга павялічыць за кошт плошчы жылых пакояў.

 Вышыня вываду каналізацыі

Вы, напэўна, бачылі прыгожыя карцінкі ванных пакояў, дзе ўзровень душавой кабіны супадае з узроўнем падлогі ў ванным пакоі: на іх няма ніякага паддона — проста трап ў падлозе і часам шкляная перагародка, якая абараняе ад моцных пырскаў. Калі вы хочаце зрабіць тое ж самае ў сваім інтэр'еры, то майце на ўвазе, што тут важная вышыня вываду каналізацыі.

 Наяўнасць балкона або лоджыі

Існуюць нормы супрацьпажарнай бяспекі, якія забараняюць далучаць балкон да жылых пакояў: у кватэры павінна быць месца, дзе вы можаце схавацца ад пажару, і гэта менавіта балкон. Дэмантаж падваконнага блока таксама вельмі складана ўзгадніць: у некаторых выпадках ён не проста архітэктурны элемент, а ўтрымлівае балконную пліту ад абвалу.

 Размяшчэнне апорных сцен

Яны вызначаюць, дзе і якія пакоі вы можаце зрабіць. Калі ў кватэры шмат апорных сцен, то прыдумаць нешта з планіроўкай вам будзе больш складана. Зрабіць праём у апорнай сцяне не заўсёды магчыма — гэта залежыць ад рамонту суседзяў знізу або зверху.

 Колькасць вокнаў і выгляд з іх

Класічнае правіла: колькасць вокнаў вызначае колькасць пакояў. Праўда, часам можна вызначаць зоны кухні ці гасцёўні далёка ад акна за шкляной перагародкай — гэта тыя зоны, якім натуральнае святло не абавязкова патрэбнае. Важны таксама памер вокнаў: панарамныя вокны заўсёды лепш, чым маленькія, бо чым больш святла, тым прасторней у кватэры. Зноў жа, дзякуючы перспектыве, што адкрываецца з вакна, пачуваешся ўтульней.

Ці варта купляць кватэру з рамонтам?

Купляючы кватэру з гатовым рамонтам, вы ашчаджаеце ў першую чаргу час: у гэтым выпадку вы можаце заехаць адразу, дарабіць нейкія дробязі ўжо пасля пераезду. Таксама гатовы рамонт беражэ нервы — тыя, хто меў справу з рамонтам, зразумеюць. З іншага боку, гатовае аздабленне не дасць вам разгарнуцца, у адрозненне ад кватэры без рамонту, якую можна ўладкаваць у залежнасці ад патрэбаў, ладу жыцця і перспектыў (усяго таго, пра што мы пісалі вышэй).

Каму пасуе кватэра з рамонтам:

  • прыватным інвестарам, якія плануюць здаваць кватэру;
  • тым, хто купляе жытло ў іпатэку;
  • сем'ям, для якіх кватэра — прамежкавы этап па дарозе да больш дарагога жытла.

Каму пасуе кватэра без рамонту:

  • тым, хто робіць кватэру на перспектыву (для дзяцей, напрыклад);
  • сем'ям, у якіх ёсць час і магчымасць уладкаваць жытло пад сябе, са сваёй планіроўкай;
  • тым, хто хоча ашчадзіць: кватэра без рамонту каштуе танней;
  • тым, у каго ёсць час чакаць, пакуль будуць весціся рамонтныя працы.

Не грэбуйце паслугамі дызайнерскіх фірмаў і бюро, з якімі вы можаце пракансультавацца да пакупкі і параўнаць некалькі варыянтаў — адмыслоўцы дапамогуць вам вызначыцца з магчымай планіроўкай. Напрыклад, яны растлумачаць, як можна размежаваць асабістыя і агульныя зоны, каб потым не паўстала няёмкіх сітуацый са сваякамі або гасцямі, ці спраўдзяць размяшчэнне «мокрых зон», да якіх заўсёды шмат пытанняў у БТІ.

ФАТАГРАФІІ: вокладка — ian doole, 2 — hanohiki — stock.adobe.com, 1 — Robert Kneschke — stock.adobe.com