Вакол здаровага ладу жыцця існуе шмат міфаў. Адзін з іх — пра тое, што сэкс адмоўна ўплывае на фізічную форму. Разбіраемся, ці так гэта насамрэч.

Цверджанне

Сэкс пагаршае фізічную форму спартсмена

Лічыцца, што сэкс перад важным спаборніцтвам можа нашкодзіць спартсмену. Нібы ад яго зніжаюцца фізічныя здольнасці, і з гэтае прычыны спартсмен паказвае вынікі горшыя, чым зазвычай. Шмат якія трэнеры футбольных каманд забараняюць гульцам кахацца перад важным матчам. Часта іх нават завозяць на базу без жонкі (або мужа) і забараняюць пакідаць тэрыторыю падчас падрыхтоўкі да гульні. Дакладна вядома, што такой практыкі трымаліся ў зборных Расіі, Босніі і Герцагавіны, Чылі і Мексікі.

Часам спартсмены адмаўляюцца ад сэксу з уласнай волі. Вядома, што перад адным з паядынкаў шэсць тыдняў не займаўся сэксам баксёр Махамед Алі. А амерыканскі лёгкаатлет Марці Лікуорыё казаў гэтак: «Сэкс робіць цябе шчаслівым. А шчаслівыя людзі не прабягаюць адну мілю (1,6 кіламетра) за 03:47». Звычайна такі падыход тлумачылі тым, што, маўляў, сэкс зніжае ўзровень тэстастэрону ў арганізме, што непажадана для спартсменаў, якія працуюць на мяжы сваіх магчымасцяў.

 Сафет Сушыч,  Трэнер, футбалicт: «Падчас чэмпіянату не павінна быць ніякага сэксу. Футбалісты могуць знайсці іншае рашэнне гэтай праблеме, могуць нават мастурбаваць, калі ім захочацца. Мяне не цікавіць, што робяць іншыя, але футбол — гэта не пікнік».

Чаму гэта не так

Няма доказаў, што сэкс адмоўна ўплывае на фізічную форму спартсмена.

Ночы без сну, безумоўна, не на карысць. Але ніводае даследаванне не паказала, што сэкс адымае ў спартсменаў моц або «разнявольвае ногі», як казаў трэнер, які працаваў з Рокі Бальбоа. Даследаванні, апублікаваныя ў «Клінічным часопісе спартыўнай медыцыны», паказваюць, што ўсё залежыць ад чалавека: камусьці сэкс дапамагае разняволіцца і пазбыцца стану трывожнасці, а камусьці прасцей адмовіцца ад яго, каб не адцягваць увагі ад трэніровак. Пры гэтым, паводле іншых даследванняў, спартыўныя традыцыі і абрады перад гульнёй дапамагаюць гульцам лепш сканцэнтравацца.

Жан-П'ер Пакле, былы лекар зборнай Францыі па футболе: «Сэкс дазваляе спартсмену разняволіцца, але не варта ладзіць бяссонных начэй. Калі гулец не разумее, што белая ноч перад спаборніцтвам — гэта дрэнная ідэя, ён можа нарабіць шмат іншых глупстваў».



Вокладка: vchalup – stock.adobe.com